سياسة الخصوصية

السياسة دي بتشرح إزاي باصاتك بتجمع بياناتك الشخصية وبتستخدمها وبتحميها، على busatak.com و app.busatak.com و rate.busatak.com، لشركات النقل والحاجزين (شركات وأفراد) والركاب. إحنا ماشيين على قانون حماية البيانات الشخصية رقم 151 لسنة 2020 ولايحته التنفيذية. مش بنبيع بياناتك لحد.

1. مين المسؤول عن بياناتك

• باصاتك هي المسؤولة (المتحكم) عن بيانات الحسابات والحجوزات اللي بتتعمل على busatak.com والتقييمات.
• بيانات العملاء المباشرين اللي شركة النقل بتسجّلها في البرنامج (app.busatak.com) المسؤول عنها شركة النقل، وباصاتك بتعالجها نيابة عنها وبتعليماتها بس.
• للتواصل في أي حاجة تخص بياناتك: privacy@busatak.com.

2. بناخد إيه، وليه

البيانات	من مين	ليه
الاسم، الموبايل، الإيميل، اسم الشركة (اختياري للأفراد)، الباسورد (متشفّر)	الحاجزين وشركات النقل وفرقهم	نعمل الحساب، تدخل، نوصّلك برسايل الحساب، ونمنع إن رقم واحد يبقى له أكتر من حساب
حساب جوجل (الاسم، الإيميل، رقم تعريف جوجل)	لو دخلت بجوجل	تسجيل الدخول بس. مش بنشوف باسوردك على جوجل
بيانات شركة النقل: الاسم، اللوجو، صاحبها، العنوان، المحافظة	شركات النقل	ملف الشركة وصفحتها العامة
المستندات: السجل التجاري أو بطاقة صاحب الشركة، رخص الأتوبيسات	شركات النقل	نتأكد إن الشركة والأتوبيس سليمين قبل ما يظهروا. محدش بيشوفها غير فريق باصاتك
الأتوبيسات: النمرة، الصور، المواصفات، الأسعار، المواعيد	شركات النقل	عرض الأتوبيس والحجز
تفاصيل الحجز، المبالغ، صور الإيصالات، المرتجعات	الحاجزين وفريق باصاتك	ننفّذ الحجز، نسجّل الفلوس، نحسب العمولة والمستحقات، نحل المشاكل
أسماء الركاب وأرقامهم	الحاجز على لينك الحجز، أو شركة النقل في البرنامج	كشف الركاب، ورسالة التقييم بعد الرحلة
التقييم والتعليق	الركاب والحاجزين على rate.busatak.com	تقييم شركة النقل ونشره
عنوان الـ IP، نوع الجهاز والمتصفح، وقت الدخول	كل اللي بيستخدم المنصة	الأمان، منع التلاعب، وإثبات موافقتك على الشروط (بنسجّل النسخة والوقت والـ IP والمتصفح)
رسايل «كلّمنا»	الزوار	نرد عليك

مش بناخد: بطايق الركاب، بيانات صحية، أو بيانات بنكية لحد. حساباتنا للكبار (18 سنة أو أكتر) بس؛ لو الحاجز كتب أسماء أطفال كركاب، ده بإذن وليّ أمرهم، ومن غير أرقامهم.

3. على أي أساس

• موافقتك: لما بتعلّم على خانة الموافقة وقت التسجيل (ومعاها موافقتك على نقل البيانات لمقدّمي الخدمة برّه مصر في بند 5).
• تنفيذ الحجز أو الاشتراك اللي طلبته.
• التزام قانوني: زي الاحتفاظ بالحسابات والفواتير.
• رسايل التسويق والعروض ليها موافقة لوحدها اختيارية، تقدر ترفضها أو تسحبها في أي وقت من غير ما ده يأثر على حسابك.

4. مين بيشوف بياناتك

• الناس على busatak.com: اسم شركة النقل ولوجوها وتقييمها وصور الأتوبيسات والمواصفات وأسعار الكراسي. التقييمات بالاسم الأول بس للي قيّم، من غير رقمه.
• شركة النقل: اسم الحاجز (أو شركته) من أول الطلب؛ بيانات التواصل وأسماء الركاب بعد تأكيد الحجز بس. بتشوف اسم اللي قيّمها، عمرها ما بتشوف رقمه.
• الحاجز: بيانات تواصل شركة النقل بعد تأكيد الحجز.
• فريق باصاتك: كل اللي محتاجه علشان يراجع ويتابع ويحل المشاكل، وبيتسجّل مين عمل إيه.
• مقدّمي الخدمة اللي بنشغّل بيهم المنصة، كل واحد على قد شغله وبعقد:
  • SMS Misr (مصر): رسايل SMS (أكواد، حجوزات، تقييم).
  • مزوّد الإيميل: الإيميلات.
  • Laravel Cloud (سيرفرات في فرانكفورت، ألمانيا) وCloudflare: استضافة المنصة وحفظ الصور والملفات وحمايتها.
  • Google: تسجيل الدخول بجوجل لو اخترته.
• جهات رسمية: لو القانون أو أمر قضائي طلب كده بس.

5. نقل البيانات برّه مصر

المنصة متستضافة على سيرفرات في الاتحاد الأوروبي (ألمانيا)، وبتعدّي على شبكة Cloudflare، وتسجيل الدخول بجوجل بيروح لـ Google. بموافقتك على السياسة دي بتوافق على النقل ده. بنختار مقدّمي خدمة عندهم حماية مش أقل من اللي القانون المصري بيطلبه، وبنمشي على الإجراءات اللي مركز حماية البيانات الشخصية بيحددها.

6. بنحتفظ بيها قد إيه

• الحساب: طول ما هو مفتوح. لو طلبت قفله، بنمسح أو نخفي اللي مش محتاجينه في خلال 30 يوم.
• الحجوزات والفلوس والفواتير والعمولات: 5 سنين من آخر السنة المالية، علشان الحسابات والضرايب والشكاوى.
• مستندات شركات النقل: طول ما الشركة على باصاتك، وسنة بعد قفل الحساب.
• أسماء الركاب وأرقامهم: سنة بعد الرحلة، وبعدها بتتخفي.
• التقييمات: طول ما صفحة الشركة موجودة (بالاسم الأول بس)، وتقدر تطلب شيل تعليقك.
• سجل الموافقات (مين وافق على أنهي نسخة وإمتى): طول ما الحساب موجود و5 سنين بعده، علشان يبقى عندنا إثبات.
• رسايل «كلّمنا»: سنة.

7. حقوقك

من حقك، في حدود القانون:

• تعرف إيه البيانات اللي عندنا عنك، وتاخد نسخة منها.
• تصحّحها أو تحدّثها.
• تطلب مسحها أو وقف استخدامها، إلا اللي القانون بيلزمنا نحتفظ بيه.
• تسحب موافقتك في أي وقت (ده مش بيأثر على اللي اتعمل قبل السحب، وممكن يمنع استخدام المنصة).
• تعترض على أي استخدام لبياناتك مالوش علاقة بالغرض اللي اتاخدت علشانه.
• تعرف لو حصل اختراق أثّر على بياناتك.
• توقف رسايل التسويق في أي وقت.
• تشتكي لـ مركز حماية البيانات الشخصية.

ابعت طلبك على privacy@busatak.com من نفس الإيميل أو بنفس رقم الموبايل اللي على حسابك، وهنرد في خلال 30 يوم. ممكن نطلب تأكيد إن ده حسابك علشان نحمي بياناتك.

8. الأمان

الباسوردات متشفّرة، والإعدادات الحساسة متشفّرة في قاعدة البيانات، والاتصال كله مشفّر (HTTPS)، وكل شركة نقل بتشوف بياناتها بس. مستندات الشركات وصور الإيصالات مش متاحة للعامة. لو حصل اختراق بيأثر على بياناتك، هنبلّغ المركز ونبلّغك في المدد اللي القانون بيحددها.

9. الكوكيز

بنستخدم كوكيز ضرورية بس: علشان تفضل داخل (لحد 180 يوم على نفس الجهاز)، ولحماية الفورمز. مافيش كوكيز إعلانات أو تتبّع من جهات تانية.

10. تعديل السياسة

لو عدّلنا السياسة دي، النسخة الجديدة بتظهر لك وتوافق عليها قبل ما تكمّل، والنسخ القديمة محفوظة.

11. كلّمنا

privacy@busatak.com لأي حاجة تخص بياناتك، أو hello@busatak.com لأي سؤال تاني.